*idatzizkoa*

Honako gutun honen bidez, nire jarrera argi adierazi nahi dut Guggenheim Urdaibai proiektuaren aurka, bai ingurumenaren kalteengatik, bai eragin sozial, urbanistiko eta publikoengatik.

Lehenik eta behin, proiektu hau kokatu nahi den eremua balio ekologiko handiko gunea da, Biosferaren Erreserbaizendatua. Ingurune hori babestu eta zaindu egin behar da, ez urbanizatu edo komertzializatu. Are kezkagarriagoa da proiektu hau ahalbidetzeko Espainiako Kostaldeko Legea aldatzea. Ingurumena babestu beharrean, legeak moldatu egin dira interes ekonomiko jakin batzuen mesedetan, eta hori onartezina da.

Horrez gain, prozesuak gardentasun falta larria izan du. Erabaki garrantzitsuak herritarren parte-hartzerik gabe hartu dira, eta informazioa eskuratzeko zailtasunak izan dira. Parte-hartze prozesu honek ez du benetako eztabaida publiko bat sustatzen, eta herritarren konfiantza ahultzen du.

Turisten hazkunde-aurreikuspenek, gainera, presio gehigarria ekarriko dute eskualdeko baliabide naturaletan, bereziki ur-horniduran. Zenbait txostenek ohartarazi dute Urdaibaik ez duela behar besteko ur-baliabiderik bisitari kopuru handia hartzeko. Turismo masiboak, halaber, etxebizitzen eta zerbitzuen prezioen igoera ekartzen du, eta horrek bertako biztanleriaren kanporatzea eta lurraldearen identitatearen galera ekar dezake.

Egia esanda, ez dut ikusten proiektu honek benetako behar bati erantzuten dionik, ezta Urdaibaiko herritarrei onurarik ekarriko dienik ere. Diru publikoak herritarren ongizatea, oinarrizko zerbitzuen hobekuntza eta gure ingurune naturala babestea izan beharko luke lehentasun, ez kanpoko interesak lehenesten dituen proiektu ikusgarri bat.

Hori guztia dela eta, eskatzen dizuet berriro azter dezazuela proiektu honen norabidea, eta benetan entzun diezaiotela Urdaibai bizia, iraunkorra eta bidezkoa nahi dugunoi.